مرحبا. بالحلقة الماضية حكينا عن تاريخ وانواع الرقص. وقلنا انه
في كتير انواع للرقص. في رقصات للحب ورقصات للحرب وفي رقصات
للحزن. وحكينا عن كل انواع الرقص بكتير دول من العالم. اليوم رح
نحكي عن تاريخ الرقص بالوطن العربي. واللي هي بتلخص بالرقص
الشرقي ورقص الدبكة. فخليكم معنا وتابعونا.
الرقص الشرقي كبداية غير محدد الزمان. ولا المكان ولكن يرجح
انه هو بلش في مصر تبعا للازياء المستخدمة بالوقت الحالي
وعلاقتها بالازياء الموجودة بمصر. والرقص الشرقي غالبا مرتبط
بالنساء. وبيعتمد على تحريك الجذع. طبعا مرتبط بالنساء قديما.
هلأ صار في عنا كتير ناس و شباب عم ترقص رقص شرقي.
وصار منتشر كتير حول العالم بالفترة الاخيرة فصرنا نشوف مدارس للرقص
الشرقي منتشرة بكل العالم. باوروبا وبشرق اسيا وحتى
باميركا. اما الدبكة فعلى اختلاف طريقتها بين بلد وبلد. بس المبدأ
واحد. مجموعة مكونة من اكتر من عشر اشخاص. واللي غالبا بيتحركوا
بوتيرة حول مكان مخصص للرقص او بساحة. والشخص اللي بكون على راس الدبكة
هو اللي بيحدد وتيرة الدبكة من حيث السرعة او البطء
او الحركات اللي موجودة فيها. وطبعا حسب الموسيقى واللي عادة
بكون الطبل جزء اساسي منا. واكتر شي ملفت هو الاساطير المرتبطة
ببداية نشوء الدبكة. ورغم تعدد الروايات الا انه كل وحدة منن
ممتعة بحد ذاتها. ومشان هيك رح حاول اذكر كل هالروايات باختصار.
الرواية الاولى بتقول انه رقص الدبكة مأخوذ من رقصة السماح.
واللي هي رقصة دينية من اكتر من الف سنة. عادة بيسيطر عليها
الهدوء والوقار. طيب عالهامش. ليش اسمها رقصة السماح ؟
لان الراقصين كانوا يستأذنوا من صاحب المكان عن طريق ترديد عبارة
السماح السماح. يعني القصة بدا اذن. مو بتمسك ايد اخر واحد بالدبكة وبتنطلق
الرواية التانية كما وردت باسطورة عشتار.
انه الهة الموت خطفت تموز الهة الخصب اللي هو حبيبها لعشتار.
عشتار حزنت. وصارت تضرب الارض برجليها لتزعج الهة الموت.
واللي بتتخذ اسفل الارض كمكان هادئ لالها. مو بس هيك. عشتار طلبت من الكل
انه يعملوا متلها فتجمعوا بشكل دائرة وصاروا يضربوا الارض برجليهم
بنفس الطريقة تبع عشتار على امل انه الهة الموت ترجع
حبيب عشتار تموز. الرواية التالتة بتقول انه الدبكة هي طقس
من طقوس الصلاة. اللي بتأديها عشتار مع الاله بعل والاله تموز.
و بيختموها بزغرودة. اعتقادا منن انه هالزغرودة تطرد الشياطين.
اما الرواية الرابعة. فيعتقد فيها انه الدبكة كانت مرتبطة
بوقت حصاد العنب والقمح. وكانوا الاهالي يجتمعوا فوق المحاصيل
ليفصلوا سنابل القمح عن الحبوب. كانوا يدبكوا فوق العنب المجمع
بالاحواض الحجرية ليحولوه لخمر. وصلنا هلأ للرواية الخامسة.
والرواية الخامسة يلي بتقول انه الدبكة مرتبطة بعمليات البناء
اللي كانت بتعتمد على الطين والقش. ولينعمل خليط هالبناء فهن
بحاجة مزج قوي فكانوا الناس يتجمعوا فوق هالمزيج ويدبكوا.
اما الرواية الاخيرة فبترجع لقصص المعارك والحروب. واللي كان
يجتمع فيها الشعب ويرقص على انغام حماسية. طبعا لبث الحماس
في نفوس المقاتلين. وعلى فكرة تم تسجيل الدبكة شرق اوسطية على
قائمة التراث اللامادي بمنظمة اليونسكو. الرقص من ناحية فنية
هو احد الفنون السبعة. وبالنسبة لعلماء النفس فبيشجعوا على الرقص
كوسيلة للترويح على النفس وصرف طاقة اذا انكبتت ممكن تؤدي
لمشاكل نفسية وصحية. هلأ منوصل للحالة الغريبة غير المفسرة.
راح احكي لكم عن ظاهرة غريبة تسمى طاعون الرقص.
بين القرن الرابع عشر والسابع عشر ميلادي انتشرت ظاهرة اجتماعية غريبة. تشبه مرض
بيجتمع فيها عدد كبير من الناس واحيانا بيوصلوا للالاف. وهالناس
بيضلوا يرقصوا لساعات وحتى لايام ليوصلوا لحالة انهيار
بسبب التعب من الرقص. وها الحالة ما كانت مرتبطة بجنس او بعمر معين
فكانت تصيب رجال ونساء واطفال من مختلف الاعمار.
ذكر انه بعام 1518 بمدينة ستراستبورغ توفى حوالي 400 شخص
بسبب الرقص المستمر لايام. وهاي الحالة ما كانت
الوحيدة ولا كانت محصورة بمكان معين. يعني ما كانت تصيب قرية
او مدينة معينة او اشخاص الن نفس العادات وفي بيناتهم قواسم مشتركة.
البعض حاولوا يفسروا هي الحالة بتسمم كان يسمى تسمم الشقران
واللي هو كان يحصل بسبب الرطوبة الناتجة عن الفيضانات.
هاد التسمم كان يسبب هلوسات. بس هاد التفسير ما كان كافي ليشرح
الحالة اللي عم يمروا فيها هدول الناس. اما تاني محاولة تفسير.
فكانت تقول انه هاي الاعراض مشابهة للضرر الدماغي او الصرع.
بس كمان ما كان تفسير كافي. وفي محاولة تالتة للتفسير. بتقول انه
هاد الهوس كان بسبب التوتر اللي كان عم يعيشوا فيه البشر بهديك الفترة.
واللي كان سببه الكوارث الطبيعية والضائقة الاقتصادية
اللي كانت تمر عليهم. ورغم كل هالمحاولات الا انه ما زالت هاي
الحالة غير مفسرة. والبعض بيشبها بحالة الانتحار الجماعي للحيتان.
وحاولوا بهداك الوقت يعالجوا هي الحالات. ولكن كل العلاجات كانت
غير مجدية. واحد من الحلول انه حاولوا يستعينوا بموسيقيين
ويسمعوا الناس موسيقى هادية. ولكن هاي الموسيقى الهادية شجعت ناس اكتر
وكمان من محاولات العلاج انه اعتبروا هدول الاشخاص
هن اشخاص مسكونين بالشياطين. وحولوا ضربن لاخراج الشياطين منن.
بالنهاية لاختم حديثي اليوم بقصة صغيرة عن زارادشت مؤسس الديانة الزارادشتية .
بتحكي عن الرقص وبتلخص فكرة جميلة: مرّ زارا بالغابة يوما. ومعه صحبة.
فاكتشف وهو يفتش عن ينبوع مرجا منبسطا بين الاشجار والادغال.
وكان هنالك رهط من الصبايا يرقصن بعيدا عن اعين الرقباء واذ لمحن القادم
وعرفنه توقفن عن الرقص. ولكن زارا اقترب منهن وخاطبهن قائلا.
داومن على رقصكن ايتها الانسات الجميلات. فما القادم بمزعج للفرحين
وما هو بعدو للصبايا انا من يدافع عن الله امام الشيطان
وما الشيطان الا الروح الثقيل فهل يسعني ان اكون عدوا
لما فيكن من بهاء ورشاقة وخفة روح ؟ وهل لي ان اكون عدوا للرقص الالهي؟
ترسمه مثل هذه الاقدام الضوامر الرشيقات.
ابتسموا وارقصوا وكونوا بخير. كنت معكم بعلامات ترقيم مع أحمد
Chrome Uzantısı